介紹由文說到武

上幾回講到文人偷食，原來武人都一様咁為食， 快手快腳去食，點會食出滋味。懂少少文筆，懂少少武術啲人粵中有俚語， 叫佢地係度也文也武/廿文廿武/吔文吔武囉。點解會走出 “也，廿，吔” 三個字嚟呢？

首先要明白依個俚語係講乜先：文武都唔得，靜係得把口。明白咗，依家去解釋就容易得多了。

也：同樣或併行。也文也武，即等於有啲文學又有啲武術，但不等於文武雙全。
廿：嘅大寫係 ”念“， 即是念口簧，簧者簧片也，彈下彈，即文與武唔夠穩重。
吔：吔同也相通， 不過多咗把口，所以口水多過實質呢。

嘩！你咁踩人點得架，人地文武雙全，你話人係度廿文廿武，小心有人發挑戰書約你上擂台比試高低。老夫咁老，上乜鬼擂台呀，一招打唔過就走喇，邊度會學人咁黐呀！話完人冇料到，依家人話人痴，你都得囉！老夫講嘅係 ”黐“， 即 黐孖筋個黐，黐痴係粵語係同音，字義不同，解釋也有相通之義。

中國近代國術有兩個拳種同黐有關：詠春與太極。詠春講到明係黐手，你隻手貼住我隻手，一有空位就直入。而太極唔叫黐叫推手，等人一唔平衡就打。兩者都有互通處，結局係打抵人。

以前聽過人講， 詠春與太極，唔學黐/推即係冇學到嘢。係唔係呀？講嗰啲人痴得好暈循（原寫是混沌）。唔好講武術只係強身健體咁狹窄，未聽過養兵千日用來一朝/招！打交自衞，要減少消耗量，以快求勝呢, 依個咁簡淺嘅原則都唔識, 點玩呀！你估拍片耍攬頭攬髻去拖時間咩。李小龍係精武門套片都示範咗四十幾年依个理論喇！ 佢一黐, 隻左手一拍, 進馬, 個右拳已到, 對手即撲緊街囉!

而王宗岳係打手歌都講咗出嚟，只係班廿文廿文係度偷食咗三個字啫！打手歌最後三句：牽動四兩撥千斤。引進落空合即出。粘黏連隨不丟頂。解作：話之你用乜方法去駛人失平衡，合嘅解釋有多様，係依度解作適合，即出：解作出手打人。 而最後一句補充上句話，唔好再紏纒喇！丟者非也，頂者抵住或支撐，簡單而言，唔好再推喇！三句合埋解作：人地一失平衡，就打抵佢，重推乜鬼啫。

人地依度嘅重點係打抵對手，網上啲解釋変咗妺仔大過主人婆，偷食咗最重要嗰三個字，”不丟頂“。咁又係嘅，講到明一招了，鬼再交學費咩，班學生都走曬囉,, 所以偷食都有理。

牽動四兩撥千斤，引進落空同粘黏連隨有分力學同暗能量，即太極和無極嘅用法。玩無極, 唔係乜嘢藝術, 藝術係攞嚟睇, 唔係攞嚟用。 無極係個身裹頭運行, 剝曬衫褲剥曬鞋人地都睇唔到喇!  搞清太極同無極嘅分別先。唔好見到人着條褲, 一定係男人先得架, 睇高啲, 再睇高啲, 哈哈。

無極依門高深學問, 係要嗰個人行過嗰條路先至識, 有料老師(不知有幾多個)大網可以教, 细節就要自己去碰釘, 因為人人體質唔同。 要有大材之用, 就要打通所有經脉, 咁容易咩!

依個王宗岳經典係濃缩精簡版, 好多嘢冇講到, 咁本原著係邊呢?  咁啲人猛去硏究經典生出嚟啲學生嘅書, 佢地吸收能力百份百, 理解能力又百份百? 有乜可能呀!  睇睇原著喇!  原著就係道学 - 包羅萬有, 哈哈。好似依家咁, 揦手唔成勢- 樣樣少咁啲, 啲人成日講好勁呀, 你玩乜勁先。

老夫多行職業, 只教出逆徒; 最近見一相識生活有因境, 教教幾招道學揾食法, 又無心向學。想當年, 有人肯教, 撲崩鼻都去學。依家啲人, 嘆!  心灰意冷, 逢人都唔教, 話之你點痴點死, 哈哈。有人會話老夫吹水啫。 係呀, 今時唔同往日, 你估成日做鼻涕蟲咩, 最怕你唔講, 一講就知閣下龍或蟲;  叫你講個單字,  "松", 都講唔掂喇, 咁簡單咩!  識就四個字, 唔識十萬字都解釋唔度, 哈哈。

用個大婆來结束依個文武話提: 大婆係頭嗰兩句減三字：合即出。 主人攞走咗嗰三個字，而妹仔係最後嗰七個字，又變成另一個咸武雙全有趣故事了，哈哈。  粵語幾好玩，文又得武又得咸又得，不過小心玩到甘來就係苦。

你黐定我痴
錯譯一句經典: 一子錯满盤皆落索; 其它內容都唔駛睇囉!